Tamil Nadu sorkar SC-ah zualko

Tamil Nadu sorkar chu state assembly-a an pass tawh, NEET exam-a an state ngaihnathiamna, NEET exemption bill chu President-in a pawmpui duh loh chungchangah Supreme Court-ah a zualko.

State sorkar chuan Tamil Nadu Admission to Undergraduate Medical Degree Courses Bill, 2021, chu India President chuan Constituion-a Article 254(2) hnuaiah a pawmpui a ngai a; mahse, President hian a pawmsak duh lo tih a sawi. President hian a chhan engmah sawi chiang si loin bill hi ni 1,400 chhung a tikhawtlai tawh a ni, an ti. President-in bill a pawm duh loh chungchang hi Union Ministry of Home Affairs chuan Tamil Nadu Governor hnenah a hriattir a, Governor hian state sorkar a hrilh lehchhawng tih an tarlang.

Supreme Court-a petition an theh luhah, Tamil Nadu sorkar chuan President-in chhan ṭha tak nei loa bill a hren khawtlai sak chu ram danpuia Articles 201 leh 254(2) bawhchhiatna a ni tiin, dan loa thiltia puang turin a ngen. Bill hi lungrual takin Tamil Nadu Legislative Assembly pass a ni tih a sawilang bawk. President-in a pawmpui loh chhan pawh sorkar laipui thurawn pek vang niin an puh bawk.

Centre-a Congress kaihhruai United Progressive Alliance (UPA) sorkar lai khan, president hlui APJ Abdul Kalam chuan Tamil Nadu hi medical admission tihna atana pawimawh, entrance test tihna tura ngaihnathiamna siamin, state chu Class XII-based system a hman a phalsak a ni.