EAM leh Russia FM Lavrov inbia

External affairs minister S. Jaishankar chuan Pathiannia Qatar-a tlawh hnuah, nimin khan Russia khawpui,Moscow thlengin Russian foreign minister Sergei Lavrov nen an inkawm. EAM-in Russia a tlawh hi Russia president Vladimir Putin-a'n thla leha India a rawn tlawh tur atana in puahchahna kawng khat a ni bawk.

S.Jaishankar hian vawiina neih tur, Shanghai Cooperation Organisation (SCO) meeting neih tura India aiawh turte a hruai nghal bawk a ni.

Russia-a neih tur SCO meeting-ah hian member ram aiawh hrang hrangte an tel dawn a, Pakistan aiawhin deputy prime minister leh foreign minister Mohammad Ishaq Dar pawh a tel dawn. Hetih laiin EAM leh Pakistan Dy PM hi inbiakna an nei dawn em tih tarlan a la ni lo thung. Russia president Putin chuan SCO hruaitute hi inbiakna a neih pui dawn niin Kremlin chuan a tarlang.

China, Russia, Kazakhstan, Kyrgyzstan, Tajikistan leh Uzbekistan-te chu SCO dintu ram niin, a hnuah India, Pakistan, Iran, leh Belarus-te chu member zauhna atan full member a pawm leh an ni.