LAB-in MHA-ah draft proposal theh lut

Ladakh-a social, political leh sakhaw intelkhawm pawl Leh Apex Body (LAB) chuan Thawhṭanni khan Ministry of Home Affairs (MHA) hnenah state-a hlankai leh Sixth Schedule pek an nih theihna tur draft proposal, phek 29-a chhah an theh lut. Proposal thehluh rual hian Ladakh mi hren mekte, climate activist Sonam Wangchuk telin chhuah turin an ngen nghal.

Ladakh Buddhist Association (LBA) president, LAB co-chairman ni bawk Chering Dorjay Lakruk chuan draft proposal an theh luh thu hi sawiin, September 24-a Leh-a buaina chhuak vanga man tawkte ngaihdam an phut thu a sawi bawk. "Kan ramah tualchhung buaina chhuak leh, ralthuam chelek ṭhinte pawh ngaihdam an nih fo ṭhin. September 24-a buaina chhuaka mante chungah pawh hetiang hi an tih ve kan beisei a ni," a ti.

Wangchuk hian Ladakh tana state leh Sixth Schedule pek phuta an nawr chungchangah, Ladakh aiawhte leh MHA chu inbiakna chhunzawm tura phutin kar thum chhung chaw ngheiin nawrh a huaihawt a ni. MHA lamin inbiak leh hun tur tihkhawtlai a nih thu a puan hnuah September 24 khan Leh-a BJP office kawtah kawngzawh huaihawtin buaina a chhuak zui a, mi pali an thih phah a ni. Hemi hnu hian MHA chuan an thil ngiatte hi ziaka theh lut tur hian a hriattir zui.

MHA hnena draft proposal theh luh hi LAB hminga theh luh niin, hemi hma October 22 khan an thil phut chungchangah hian LAB leh Kargil Democratic Alliance (KDA) aiawhte leh MHA chuan inbiakna hi an chhunzawm leh a ni.