November 26-ah National Gopal Ratna award hlan dawn

Union Animal Husbandry Ministry hnuaia loneitu thawk ṭhate hnena chawimawina hlan ṭhin, National Gopal Ratna Award(NGRA) chu November 26 hian hlan an ni dawn. Sorkar laipui chuan kuminah NGRA dawng tur hian loneitu leh cooperative huang aṭangin dilna 2,081 an dawng a ni.

Aravind Yashavant Patil, Kolhapur, Maharashtra ami chuan tualchhung bawng leh lawi aṭanga bawnghnute thar tam ber award a dawng dawn a; Meenangadi Ksheerolpadaka Sahakarana Sangham Ltd, Wayanad, Kerala chuan dairy cooperative society huangah thawk ṭha ber award a dawng dawn bawk. North Eastern leh Himalayan huamchhungah Hamirpur, Himachal Pradesh mi Vijay Lata chu 'Best farmer' atan thlan a ni a; Kulha Duud Udpadhak Sahkari Samiti, Udham Singh Nagar, Uttarakhand chu 'Best Cooperative society' atan thlan a ni bawk.

Best Artificial Insemination Technician (AIT) awards chu Dillip Kumar Pradhan, Anugul, Odisha; Vikas Kumar, Hanumangarh, Rajasthan; Anuradha Chakali, Nandyal, Andhra Pradesh leh Deluwar Hasan, Barpeta, Assam hnenah hlan a ni ang.

Award dawngtu tura thlan, pakhatna aṭanga pathumnate chuan pawisa fai Rs 5,00,000; Rs 3,00,000 leh Rs 2,00,000 bakah memento leh certificate hlan an ni dawn. Himalayan leh North Eastern huam chhunga pakhatna dawngtu hnenah Rs 2,00,000 pek an ni ang. Hetih laiin AIT category hian pawisa a keng tel ve lo a ni.