Pawisa tih thih duh loin eptuten nawrh an huaihawt

Eptu party ṭhenkhatin nimin khan sorkar laipuiin Rs 500 leh Rs 1,000 note a tih thih avanga mipuite chunga harsatna lian tak a thlen avanga lungawi lohna lantirin, ram pum huap nawrh ëBharat Bandhí an huaihawt.

Nawrh huaihawt hi eptu party ṭhenkhat chuan an thlawp lo thung. Left Front-in total bandh huaihawt hi a thlawp a, mahse Congress, Trinamool Congress leh Aam Aadmi Party chuan mipui nunphung a khawih buai dawn leh a hautak dawn avangin an duh lo a, mahse Parliament leh pawn lamah pawh an lungawi lohna chu lantir zel an tum tih an sawi.

BSP hotu Mayawati pawhin pawisa note tih thih chu an party chuan dodal zel mah se, nawrh huaihawtnaah erawh chuan an tel lo tih a sawi. BJP chu thla 10 kalta chhunga bank-a sum an dahluh zat puang turin a phut a, BJP in pawisa note tih thih tur an hriat lawk avangin Bihar-ah ram an lo lei lawk nasa hle nia sawi chungchangah insawifiah turin a phut bawk.

West Bengal-ah chuan Chief Minister Mamata Banerjee hoin chawhnu lamah Kolkata khawpuiah kawngzawh huaihawt a ni a, mahse school, office leh factory te chu khar an ni lo.

Left Party sorkarna, Kerala-ah chuan bandh hian nghawng a nei lian thung a, dawr khar an nih bakah public transport pawh an chhuak lo. Mahse bandh hian bank, ramdang khualzin leh an chuanna motor-te a huam tel lo thung. Thiruvananthapuram-a lungawi lohna kawngzawh huaihawtah finance minister Thomas Issac bakah cabinet minister
ṭhenkhatte an tel.

Uttar Pradesh-ah Samajwadi Party worker-teín Allahabad-a Prayag Station bulah PM Modi-a lim an hal a, Congress activist-te chuan Chow-a Clock Tower-ah public meeting an huaihawt thung. Mahse party pahnihte hian Bharat Bandh huaihawtah chuan a tel ve lo tih an sawi. UP Chief Minister Akhilesh Yadav chuan sorkar laipui chuan pawisa note tih thih vangin mi rethei leh kut hnathawktute, sumdawngte chunga harsatna lian tak thlenah a lo puh tawh a ni.

Tamil Nadu-a eptu pawl hrauitu, DMK hotu ni bawk MK Stalin hoin nawrh hi huaihawt a ni a, mahse police-te chuan Stalin-a telin an zinga mi eng emaw zat chu an hreng zui a ni.

Karnataka-ah chuan Congress leh CPI(M) party unit-te chuan bandh huaihawt loin rally an nei thung a, school tam zawk pawh an kal a, transport service pawh a nghawng buai lo.

Maharashtra-a chuan Congress worker-teín Kalina, Mumbai aṭangin ëJan Aakroshí march an nei a, party hruaitu senior Ashok Chavan bakah Mumbai president Sanjay Nirupam-teín an telpui.

Orissa-ah chuan CITU (Centre of Indian Trade Unions) National Conference member-teín Puri-ah kawng an zawh.

Bihar-ah chuan CPI(ML) worker-teín rel an dang. Nawrh huaihawt vang hian Gaya-Patna section-a rel tlan a khaihlak a, Hatia Patna express pawh Gaya station-ah darkar li vel dintir a ni bawk.