Firfiakten J&K-ah army camp an bei

Jammu and Kashmir-a Nagrota biala Indian Army 16 Corps headquarters bula army camp chu nimin zing khan firfiakten an bei a, sipai pathum an thi a, sipai pali leh police pakhatin hliam an tuar. Camp beitu firfiak palite chu sipaite hian an kaphlum vek a ni.

Firfiakte hian zing dar 5.30 velah Army camp hi an bei a, sipaite nen hian nimin chawhnu lam khan firfiakte hi an vaiin kahhlum a ni. He thil thleng vang hian state thuneitute chuan Nagrota khuaa school te chu nimin khan a khar tir vek a ni. Army camp beihnaa sipai thi zingah hian major pawh a tel.

Nimin vek han Nagrota
aṭanga km 70 vela hlaah ramri kana rawn luh ruk tumte leh sipaite an inkap a, mi pathum kahhlum an ni a, BSF sipai parukin hliam an tuar.

Prime Minister Narendra Modi chu sipai camp beih anih chungchang hi sawipui nghal a ni tih defence minister Manohar Parrikar chuan a sawi. Firfiakten an beih,16 Corps hi Pir Panjal range chhim lamah line of control vengtute an ni.

Public Relations Officer Lt Col Manihs Mehta chuan firfiakte hian camp an luh hnuin, Army Officers Mess chu an bei niin a sawi. Hemi hma hian 166th Army Regiment camp beih an tum a, an hlawhchham avangin officer-te awmna hmun hi an bei leh a ni. Firfiakte beih letnaah hian sipaite hi paramilitary commando-teín an pui bawk.