Ramchhung

Bank-in Rs vbch nuai 8.45 dawng tawh

Sorkar laipuiin November 8 zanlai aṭanga Rs 500 leh Rs 1,000 a tih thih hnuah, ram≠chhunga bank hrang hrangte chuan November 10-27 inkar khan pawisa note thi, cheng vaibelchhe 8,44,982 an dawng tawh.

Bank-te hian hemi chhung vek hian an counter leh ATM-ah cheng vaibelchhe nuai 2.16 an pe chhuak tawh bawk niin RBI chuan a tarlang. Pawisa note hlui hi thleng theih ni tawh lo mah se, kumin December 31 thleng bank account-ah dahluh theih a la ni ang.

Fidel Castro vuinaa tel turin Rajnath Singh a zin

Union Home Minister Rajnath Singh chu kar kalta Zirtawpnia thi Cuba ram president hlui, Fidel Castro-a vuinaa tel turin nimin khan Cuba khawpui, Havana a pan.

Thawhṭanni aṭang khan Havana-ah Revolution Square-ah Fidel Castro sunna hi hman ṭan a ni a, he hunah ni hnih chhung hriatrengna hun hman a ni ang. Castro-a ruang hi Inrinni khan halral a ni a, a vap hi an ram chhung hmun hrang hrangah ni li chhung kalkualpui a nih hnuin, December 4 hian Santiago de Cuba-ah phum a ni ang. Rajnath Singh hi political party hrang hrang aiawhten an zui a ni.

Sonia Gandhi damdawi-inah dah luh a ni

Congress President Sonig Gandhi chu khawsik sang avangin damdawi-inah dah luh a ni. Gandhi hi a damsam loh avangin Parliament thlasik ṭhutkhawm neih mekah pawh a tel mumal lo.

August thla khan Varanasi-a road show neih laia a dam loh avangin damdawi-inah dah a lo ni tawh a, kar eng emaw zat enkawl a lo ni. A hmain ram pawn lamah pawh enkawl a lo ni tawh a, mahse enkawl a nih chhan tak erawh chu puanzar a ni lo. Kum 69-a upa, Sonia Gandhi hian kum 1998 aṭang khan Congress president dinhmun a chelh tawh. October thlaa Congress party thuneitu sang committee chuan a fapa, kum 46 mi Rahul Gandhi chu party president atana hlankai an remti a, mahse a hun erawh a la tichiang lo. Rahul Gandhi hi kum 2013 khan party vice president atan dah a lo ni tawh a ni.