Mamata-i’n PM chenna in kawta nawrh huaihawtah vau

West Bengal Chief Minister Mamata Banerjee-i chuan sorkar laipuiin Rs 500 leh Rs 1,000 note tih thihna thupek a tihchhuah tawh chu a sut loh chuan Prime Minister Narendra Modi-a chenna in kawtah nawrh huaihawt a tum thu a sawi a, PM chu a thuneihna aṭanga paihthlak a tum tih a sawi bawk.

Banerjee-i chuan pawisa tih thih avang hian ram pumin a tuar a, bank leh ATM-ah pawisa a awm lo a, mipui≠te chunga harsatna a thlen avangin mi 80 zetin an thih phah tawh a ni, a ti. Hetianga ram mipuite an buai lai leh harsatna nasa tak an tawh lai hian PM Modi chu tui takin a mu thei a, cashless economy chungchangah thu a la saw thei reng a ni, a ti.

West Bengal CM chuan, ìThingtlanga cheng a tam zawkin bank account an nei lo a, engtinge an awm tak ang?î tiin, sorkarin a thupek chu a sut hma chuan a theihtawpa nawr zel a tum tih a sawi. Mipuite harsatna chinfel a nih theihna turin sorkar laipui chu thurawn pawh a pe a, mahse hei hi a pawmsak duh lo niin a sawi. PM Modi chuan a duhdan sawiseltute chuan aw an chhuah veleh anmahni bei let turin CBI, ED leh Income Tax official-te a tir nghal a, mahse a ni chu a zam mai dawn lo tih Mamata Banerjee chuan a sawi a, Delhi-ah kalin a ṭul a nih chuan PM chenna kawtah ngei lungawi lohna lantir a tum tih a sawi.