Vawiinah Bihar sorkar thar la lut dawn

Bihar assembly inthlan neih zawh taka hnehna changtu, BJP kaihhruai NDA sorkar thar chu vawiinah lak luh a ni dawn. Chief minsiter ni lai, kum 75 mi Nitish Kumar chu a vawi 10-na turin governor Arif Mohammad Khan chuan rinawmna thu tiamtirin CM atan a la lut dawn a ni.

Assembly inthlanah khan NDA hian seat 243 awmah seat 202 a la a ni. JD(U) leh BJP chuan nimin khan Patna-ah legislature party meeting neiin, Nitish Kumar chu NDA hruaitu leh JD(U) hruaitu atan an thlang.

Sorkar thar lak luh inkhawm hi Gandhi Maidan-ah neih a ni dawn a, prime minister Narendra Modi, union home minister Amit Shah bakah NDA rorelna state-a CM eng emaw zatin an telpui dawn bawk. CM lak luh rual hian MLA 18-20 vel lak luh an ni nghal dawn nia sawi a ni.

BJP chuan legislature party leader leh deputy leader atan Samrat Chaudhary leh Vijay Kumar Sinha an thlang bawk a, deputy chief minister-ah an awm zui leh rin a ni bawk. Assembly speaker post changtu tur erawh tihfel a la ni lo a; mahse, BJP lam chuan an chan turah an ngai a ni.

Bihar inthlanah hian NDA-a tel party zingah BJP chuan seat la hnem berin seat 89 a la a, Nitish Kumar kaihhruai JD(U) in seat 85, LJP(RV) in 19, HAM in seat panga, leh RLM in seat pali an la ve bawk. Eptu ṭangrual pawlten seat 35 chauh an la pha a, Rashtriya Janata Dal chuan seat la hnem berin seat 25 an la a, Congress-in paruk, CPI-ML in pahnih, CPI(M) leh Bahujan Samaj Party in seat khat ve ve an la bawk.