AL Falah Group chairman ED-in hreng ve leh
Delhi court chuan nimin khan Red Fort bula thihchilh bomb tihpuahnaa inhnamhnawihte thawhna, Al Falah univesity founder Jawed Ahmed Sidiqui chu sum tihchingpena puhna chungchangah Enforcement Directorate(ED) hnenah thu zawhfiah turin a hlan. ED hian Ahmed Sidiqui hi ni 13 chhung an kawl dawn a ni.
November 10-a Red Fort bula car-a bomb puak chu Al Falah University-a thawk Dr. Umar Un Nabi tihpuah a ni tih leh, thihchilh bomb a ni ngei tih pawh finfiah a ni tawh bawk.
Ahmed Sidiqui hi Thawhlehni khan firfiak pawl nena inthlunzawm sum khawih chingpen chungchangah man a ni a, additional session judge hmaa hruai a nih hnuah ED hnenah hian hlan a ni zui ta a ni. ED chuan Al Falah University chuan UGC hriatpuina nei leh NAAC accreditation nei loin nei angin a lo inchhal thu an tarlang a; university chuan kum 2018-25 chhungin Rs vbc 415.10 hlawkna an dawng tih an hmuchhuak bawk a ni.
ED chuan university hian kum 2018-29 chhunga Rs vbc 24.21 hlawkna an tel chu kum 2024-25 ah Rs vbc 80.10-ah a pung tih sawiin; he university dintu pawl, Al Falah Group chu 1990 hnuah nasa takin a ṭhang bawk tih an sawi. Sididqui hi Al Falah dintu a nih bakah hemi hnuaia charitable trust leh sum chetvelna zawng zawng a thunun tih an tarlang tel bawk.
Ahmed Sidiqui hi Prevention of Money Laundering Act (PMLA) hmangin hren mek niin, Al Falah Trust leh university chhehvel hmun19 an dapna aṭangin pawisa Rs nuai 48 bawr an man bawk a ni.