Jharkhand-in AI-based 'elephant alert system' hmang dawn

Jharkhand sorkar chuan pilot project atan Jamshedpur Forest Division-a Chakulia Range huam chhung Rajabasa khuaah AI-based alert system a hmang dawn.

Divisional Forest Officer (DFO) Saba Alam Ansari chuan an state-in AI-based hoter system an hman hmasakna ber tur a ni tih sawiin, "Khaw chhungah sai lut chu AI-based camera hian a lo hmu thei dawn a, khaw chhung mite fimkhur tura hriattirna a ti ri nghal dawn bawk a ni," a ti. He system hi ni zung chakna hmang vek niin, power supply awm loh lai pawhin lap top leh mobile app aṭang pawhin a en theih vek dawn a ni, a ti. Enchhinna an kalpuina, Rajabasa khaw pum vil theihna turin camera panga dah tum a nih thu a sawi bawk. An project hlawhtlin dan azirin sai tamna hmun dangah pawh he system hi hman tum a nih thu a tarlang.

Ansari chuan AI-based alert system hman chuan saiin khaw chhunga mihring leh in a beih ṭhinte a dan theih dawn a, hei bakah mihring nena an inlaichinna ṭha zawk siam theihna turin a pui thei dawn a ni, a ti. Alert system hi sai rual an luh chauhin a ri dawn a, ramsa dang lut emaw mihring tei velah a ri dawn lo tih a sawi bawk.

Chakulia Forest Range huam chhungah hian sai rual an lut fo a, mihring pawh an bei fo a ni. Hei vang hian invenna atan ruahmanna thar hi an siam ta a ni.