Chidambaram-a'n press meet nei Kashmir leh economy chungchang sawi

Union minister hlui leh Congress hruaitu, P Chidambaram chu ni 105 chhung jail-a tantir a nih hnuah Nilaini khan bail-a chhuah a ni a, nimin khan New Delhi-ah press conference a nei zui nghal. 

Congress hruaitu hi nimina Parliament rorel inkhawmah a tel nghal a, a hnuah press confe­rence hi a nei zui a ni. Chidambaram chuan press conference-ah hian Jammu and Kashmir mi­puite dinhmun a hriat­thiampui thu a sawichhuak hmasa ber a ni. "Nizan dar 8-a jail aṭanga chhuak a, zalenna boruak ka  han hip chiah khan, ka rilrua lo lang hmasa ber chu Kashmir Valley-a cheng mi nuai 75, August 4 aṭanga an zalenna hmang thei loa awmte an ni," a ti. Hei hi August 5-a BJP kaihhruai sorkar lakpuiin Jammu and Kashmir special status pekna, Article 370 a tihtawp dawn avanga a hma zan aṭanga khuahkhirhna a lo siam lawk chungchang a sawina a ni. 

"Kashmir-a political leader, thubuai pawh siamsak ni si loa tun thlenga lo hrenbehte dinhmun chu ka ngaihtuah hle a ni," tiin Chidambaram chuan zalenna kan ngaihlu a nih chuan heng mite zalenna tur hian kan bei tur a ni, a ti. Sorkar laipuiin a phalsak chuan Jammu and Kashmir tlawh ngei a tum thu a sawi bawk. 

Chidambaram chuan prime minister Narendra Modi kaih­hruaina hnuaia ram economy dinhmun tlahniam zel chungchang a sawichhuak bawk. Union finance minister hlui chuan Modi-a kaihhruai sorkar chu ram economy enkawl tlak lo nia a ngaih thu a sawi. Ram economy dinhmunin tlakhniam lam a pan laiin PM Modi chu a ngawi tlat a, a minister-te chu dawt leh thil awmze nei lo a sawitir mai mai a ni, tiin Chidambram chuan a sawi.