Politics vanga hrente J&K-in chhuah la tum lo

Parliament thlasik ṭhutkhawm neih mekah Union Minister of State for Home G Kishan Reddy chuan  sorkar laipuiin Jammu and Kashmir-a politics vanga a hrente chhuahna tur engmah a awm loh thu Nilaini khan a sawi.

Ministry of Home Affairs (MHA) chuan Rajya Sabha inkhawmah hian J&K-a politics vanga sorkarin a hrente hi mi 617 an nih thu tarlangin, chung zinga mi 261-te chu Uttar Pradesh leh Haryana-a hren an nih thu leh, mi 356-te chu Jammu and Kashmir (J&K)-a hren mek an nih thu a tarlang bawk.

J&K-a sorkarin a hren mi 41-te chu nikum khan Haryana-a sawn an nih thu leh, kum 2014, 2015, 2016 leh 2017-ah tumah sawn an awm loh thu MHA chuan a tarlang. August 5-a J&K special status, Article 370 hlihsak a nih lai khan, J&K-a an mi hren ṭhenkhatte chu hmun danga sawn an awm thu sawi ni mah se, MHA chuan eng zat nge sawn an nih a tarlang lo.

Politics vanga sorkarin J&K-a a hrente zawhna chungchang chu Reddy chuan chhangin, J&K jail-ah hian mi 3,248 an tan mek thu leh state pawna J&K mi an hren nen avaiin mi 3,509 jail tang an awm thu a sawi. Heng zingah hian August 5-a Article 370 hlihsak chungchang kaihhnawih avanga thubuai neite pawh an tel a ni.

August 4 hnua venthawn thila mi an hrente nen an vaiin mi 5,161 hren mek an nih thu leh chung zingah chuan politician, activist-te leh stone pelter-te an tel thu Reddy chuan a sawi lang bawk. J&K-a activist-te leh pawl ṭhenkhatte hi India aṭanga inlakhran duhtu pawl Hurriyat Conference nena an inzawm thu Rajya Sabha inkhawmah hian Reddy chuan a sawi bawk.