Sorkarin pawisa deposit theih hun pawhsei a tum lo

Sorkar laipui chuan pawisa note tih thih, Rs 500 leh Rs 1,000-te chu bank account-ah December 30 thleng dahluh a phalsak a, a hun tiam hi pawhsei a tum lo tih a sawi.

Hemi chungchanga zawhna hi Rajya Sabha inkhawmah, Minister of State for Finance Arjun Ram Meghwal chuan ziakin a chhang a ni. Minister chuan, ìReserve Bank of India leh bank hrang hrangah pawisa a tam tawk a, Rs 100 note pawh tam zawk pekchhuak a ni tawh a, hei vang hian sorkar chuan hun pawhsei chungchang hi a ngaihtuah loî a ti.

Thingtlang lama sum lama buaina chinfel a nih theih nan sorkar chuan bank-te chu Rs 100 leh a hnuai lam note-te tam zawk pe chhuak turin a ngen tih a sawi.

November 8 zanlai aṭanga Rs 500 leh Rs 1,000 note tih thih a nih hnu khan, sorkar laipui chuan pawisa note hlui thleng leh bank-a deposit theih hun hi a bithliah nghal a ni. Pawisa note thi thleng theih hun hi kar kalta Ningani zan aṭang khan tihtawp a ni a, mahse bank account-ah chuan December 30 thleng deposit theih a ni thung. Bank aṭanga sum lakchhuah theih zat hi bithliah chin siam ni mah se, a dahluh theih zat erawh hun bithliah siam a ni lo thung. RBI chuan bank hrang hrang hnenah pawisa fai Rs 5,000 chin desposit tumtu, bank accound holder-te chu an PAN card copy submit tel tir turin a hrilh. Hei bakah hian bank leh post office-te chuan savings account-a cheng nuai 2.5 chunglam deposit-te chu IT department-ah an report zel a ngai a, account-a cheng nuai 12.50 chunglam neite pawh a report bawk ang.