RBI-in Jan Dhan account aṭanga sum lak theih bithliah

Reserve Bank of India (RBI) chuan nimin aṭang khan Pradhan Mantri Jan Dhan Yojana (PMJDY) hnuaia KYC compliant account holder-te sum lak chhuah theih zat a bithliah a, thla khatah Rs 10,000 chin lakchhuah theih a ni ang.

Thla khat chhunga sum lakchhuah theih zat a bithliah lai hian RBI chuan account neitute an mamawhna a zirin sum lakchhuah belh phalsak an ni mai thei tih a sawi.

Non-KYC compliant account holder-te chu SBN kaltlanga sum an dah aṭangin thla khatah Rs 5,000 chin lakchhuah phalsak an ni bawk.

Prime Minister Narendra Modi-aín Rs 500 leh Rs 1,000 tih thih a nih thu a puan hnuah, ramchhunga Jan Dhan account neitute pawisa chet vel danah rinhlelhawm tak tak a tam hle nia sawi a ni. November 16 thleng khan PMJDY hnuaia account siam, vaibelchhe 25.58 a sum dahluh zat hi cheng vaibelchhe 64,252.15 a tling a ni.

Kum 2014 khan PM Modi chuan Jan Dhan scheme hi a hawng a, mi tam zawkin banking service an hman ṭangkai theihna tura hmalakna a ni. Mahse pawisa note tih thih a nih hnuah mi tam takin mi rethei zawkte account chu an sum dahṭhatna atan an hmansak nia sawiin, PM chuan hetianga dik lo taka thil titute chu dan hmangin na taka hrem an nih tur thu a sawi.