Nabha jail-a tangte tlan-chhuah vangin mi pathum man

Punjab-a Nabha jail chu ralthuam keng mi 10-teín luhkhungin an bei a, tang mi panga an tlanchhuah pui. He thil thleng vang hian Thawhlheni khan jail assistant superintendent Bhim Singh leh head warden Jagmeet-te chu man an ni a, Nabha-a Shagun sweets dawr neitu, Tejinder Sharma pawh man a ni bawk.

Assistant superintendent Bhim hian jail
aṭanga tlanchhuakte hi an tlanchhuah hma ni khan a hmu a, anni hian a phone pawh an hmansak niin police-te chuan an sawi. Police-te chuan he thil thleng kaihhnawihah hian mi 29 thubuai an siamsak tawh a, an zingah hian jail official pakua an tel.

November 27 khan police uniform-a inthuam, ralthuam nena thawkchhuak mi 10-te chuan Nabha jail hi an luhkhung a, Khalistan Liberation Front hotu Harminder Singh Mintoo bakah midang pali an tlanchhuahp pui a ni. Mahse Mintoo hi Delhi-a Nizamuddin rel station-ah police-te an man leh tawh a ni.

Jail beihna ruahmantu bera puh, Parminder Singh pawh Uttar Pradesh-ah man a ni bawk a, nimin khan Muzaffarnagar district jail-ah sawn a ni.