Ramchhung

Pakistan-in tum 430 inremna palzut

India leh Pakistan-in Jammu and Kashmir-a ram pahnihte inrinaa inkahhai an puan chu kum khat chhungin, Pakistan sipaiten ṭum 430 zet an palzut tih Rajya Sabha-ah sawi chhuah a ni.

Minister of State for Defence Subhash Bhamre Bhamre chuan November 25, 2015 leh November 26, 2016 inkar khan, Line of Control (LC)-ah ṭum 216 leh International Border (IB)-ah ṭum 214 zet inkahhai puan chu an palzut tih a sawi. Silai hmehpuah a nih vang hian India sipai pariat an thi a, mi dang 74 in hliam an tuar.

Cinema hall-ah hnam hla play turin ti

Supreme Court chuan ramchhunga public theatre-ah eng movie pawh screening neih a nih dawnin India hnam hla play hmasa zel turin a ti.

Court chuan hnam hla play tihdanglam emaw, show peng pakhat anga lantir a remti lo tih a sawi a, India khua leh tuite chuan hnam hla leh hnam puanzar te chu an zah tur a ni, a ti. Hnam hla play lai hian mipuite chu an awm hmun aṭanga ding vek tura tih an ni bawk. Hnam hla thu te duh duhna hmuna lo print ringawt pawh a khap nghal bawk. Maharashtra state-ah pawh film screening naah hian hnam hla hi play ṭhin a ni tawh a, mahse hnam hla play laia ding duh lote chu kut thlak an nih ṭhin avangin sawisel a hlawh hle.

West Bengal-a army helicopter tlaah officer pathum thi

West Bengal-a Sukna bulaah nimin khan Indian Army Cheetah helicopter a tla a, officer pathum an thih bakah JCO in hliam an tuar.

Cheetah chopper hi zing dar 10.30 vel khan Sukna Military Camp helipad lama a kir chu a tla a ni. Sukna hi Siligur bula awm a ni a, Indian Army 33 Corps te awmin, sipaite aircraft hi Army Aviation Corps in a enkawl a ni. Helicopter chetsual dan chhui chiang turin thupek tihchhuah nghal a ni.