Purunsen man sang zel duhlohna Congress-in lantir

Congress MP-te chuan nimin khan Parliament complex-a Mahatma Gandhi lim hmaah ramchhunga purunsen man to zel duh lohna an lantir.

Duh lohna lantirtute hian sorkar chu purunsen man sang zel chungchangah hian hma la thuai turin an phut a ni. He hunah hian finance minister hlui leh senior party leader P. Chidambaram leh Lok Sabha-a an party leader Adhir Ranjan Chowdhary-te pawh an tel. 

Purunsen man hi rampumah a sang chho zel a, nimin khan Hyderabad leh West Bengal-ah chuan kg khat Rs 150 a kai chho a, Tamil Nadu-ah chuan Rs 120 a ni bawk. Kumina ruahsur nasa avangin purunsen tharchhuah hi a tlahniam nasa hle a, purunsen tharchhuak hnem Maharashtra leh Karnataka state-ahte chuan tuilianin an thlai chin hi a tichhe nasa hle a ni. Hei vang hian a man pawh a sang chho chak hle. 

Purusen mamawhna phu­hrukna turin state trading firm, MMTC chuan Turkey aṭanga lak­luh turin ton 4,000 a order tawh a, heng hi nakkum January thlaah a rawn thlen hman beisei a ni.