Taliban trade minister India-ah rawn zin

Afghanistan-a Taliban sorkar leh Pakistan sorkar an inep mek karah, Taliban sorkara Industry and Commmerce minister Alhaj Nooruddin Azizi chuan Nilaini khan ni nga cham turin India a rawn thleng. Azizi hma hian Taliban sorkara acting foreign minister Mawlawi Amir Khan Muttaqi leh external affairs minister S. Jaishankar chu thla hmasa khan thawh dunna tih hmasawnna turin an lo inkawm tawh a ni.

Azizi rual hi sumdawng lian eng emaw zatin an rawn zui a, Nilainia neih India International Trade Fair(IITF) 2025 an chhim nghal a; India nena insumdawn tawnna leh investment huanga thawh dunna tihhmasawn beisei a ni. Azizi hian India a sumdawnna lian aiawhte kawmin, thawh dunna tur chungchangte an sawi ho bawk.

India leh Taliban sorkar hian tun hnaiah thawh dunna tihhmasawnna tur an buaipui chho mek a, Muttaqi rawn kal ṭum khan boruaka inkalpawhna hmanga insumdawn tawnna tihchak an lo remti tawh a ni.

Afghanistan leh Pakistan inkar ṭha lo mek avang hian Taliban thuneitute Pakistan an mamawhna tihtlem tumin hma an la a, Afghan sumdawngte chu Pakistan port leh sumdawnna kalkawngte chu in remna fel tak neih a nih hma chu hmang lo turin a hriattir tawh a ni. Ram pahnih inremna palai atan Turkey chu thawk chhuak tawh mah se, buainate hi an la chingfel thei lo.