Delhi bomb puak kaihhnawihah NIA-in mi 4 man belh

National Investigation Agency(NIA) chuan nimin khan November 10-a Delhi-a bomb puak kaihhnawihah mi dang pali an man belh leh. Heng mite nen hian bomb puak kaihhnawihah hian NIA-in mi paruk an man ta a ni.

Mi pali mante hi District Sessions Judge, Patiala House Court-in thupek a tihchhuah bawhzuia man an ni.An mi mante hi Dr. Muzammil Shakeel Ganai, Pulwama (J&K); Dr. Adeel Ahmed Rather, Anantnag (J&K); Dr Shaheen Saeed, Lucknow (Uttar Pradesh) leh Mufti Irfan Ahmad Wagay, Shopian (J&K)-te an ni a, pawikhawihna thlengah khan a bultumtu an nih thu NIA chuan an tarlang.

He mi hma hian NIA hian mi pahnih, Amir Rashid Ali leh Jasir Bilal Wani chu an lo man tawh bawk a; Ali zawk hi bomb tihpuahna car kha a hminga register niin, Wani hian bomb tihpuahna atana hmanraw hrang hrang hi firfiak pawlte tan a lakkhawm sak tih hriat a ni tawh a ni; an pahnih hian NIA in an kawl mek a ni.