SC-in hmeichhia, pasal nei lote thurochhiah siam turin fuih

Supreme Court chuan ram chhunga hmeichhia, fa nei lo leh pasal nei lote chu an thih hnuah ro inchuh buaina awm tur venna atan thurochhiah siam turin a fuih. A bikin Hindu hmeichhiate chu thurochhiah siam chungchang hi ngai pawimawh turin a chah.

Court hian advocate hmeichhia, Snidha Mehra in Hindu Sucession Act-a section 15 (1)(b) khing a, PIL a thehluh a ngaihtuahnaah hei hi a sawi a ni. Section 15 (1)(b) hnuaiah Hindu hmeichhia chu thurochhiah nei loa a thih chuan a ro zawng zawng chu a pasal roluahtu kutah a lut dawn a ni. Mehra hian he dan hi inthliarhranna a ni tiin, ram danpuia article 14,15 leh 21 a bawhchhia tih a sawi a, hmeichhe nu leh paten an fanu ro rochun tura an dikna chanvo a dansak a ni, a ti.

Justice B.V. Nagarathna leh justice R. Mahadevan ṭhutna bench chuan thubuai a ngaihtuahnaah hmeichhiate chu ro chungchanga intihbuai awm thei venna tura thurochhiah siam tur hian an fuih a ni. Hindu Succession Act, 1956 chu hmeichhiate’n anmahni in leh lo nei thei loa rin a nih laia siam a ni a, tun laiah chuan hmeichhiate chu zirna chauh ni lo, hnathawhna lamah pawh dinhmun sang tak tak chelh, mahni in leh lo nei an tam tawh a ni, a ti. Hei vang hian fa nei lo leh pasal nei lote chu an thih hnua an ro chungchang inchuhbuaina a awm lohna atana fimkhur a, thurochhiah siam turin a fuih a ni.