Faridabad police-in Al Falah Univesity chhui tur SIT din

Ram chhunga agency hrang hrangin November 10-a Delhi-a bomb puak chungchang chhui chianna an kalpui mekah firfiak pawl kaihhnawih eng emaw zat man an ni tawh.Hetiang karah hian Faridabad police chuan Al Falah University chetvel dan chhui chiang tur Special Investigation Team hran an din ve leh.

Al Falah Univesity-a thawk doctor leh mi challang tak takte chu bomb puak kaihhnawihah hian man an lo ni tawh a, investigating agency hian cab driver, cleric leh Urdu teacher chu zawhna zawhfiah turin an hreng leh bawk. SIT-ah hian police assistant commissioner pahnih, inspector, leh sub-inspector pahnih awmin university chetvelna report kimchang buatsaih tura tih an ni.

Faridabad Commissioner of Police Satender Kumar Gupta chuan, SIT hnenah hian university chu eng vanga firfiak pawl kaihhnawih tamna hmun nge a nih chhui chiang turin a hriattir. Firfiak pawl funding leh puak thei thil neih dan kimchang hre tura an chanchin hrang hrang ngaihven turin a ti bawk. Hriat chhuah loha firfiak pawlin university inkhuar nana an lo hman dan chu chhui chhuah ngei tum a nih thu an tarlang bawk.