PM Modi leh South Africa President inbia

Prime minister Narendra Modi chuan nimin, Pathianni khan Johannesburg-a G20 Summit neih kar lakah South Africa president, Cyril Ramaphosa hmuin, kawng hrang hranga thawh dunna neih theih dan tur an sawidun. Thawh dunna tur an sawi ho zingah sumdawnna, investment, mining, mineral, AI leh ei leh in security-te an tel. PM Modi hi November 21 - 23 chhunga G20 Leaders' Summit vawi 20-na hmangin South Africa-ah hian a zin a ni.

Ram hruaitu pahnihte hian technology leh mipui inzawmna tihchangtlunna turin ram pahniha ṭhalaite pawimawhna an sawi bawk tih External Affairs thupuangtu Randhir Jaiswal chuan meeting neih zawhah a social media-ah a tarlang. Modi chuan South Africa president chu kumin G20 summit hlawhtling taka a buatsaih avangin lawmthu a hrilh bawk.

G20 Summit hi Africa rama neih a nih vawikhatna a ni. PM Modi hian South Africa a tlawh vawi lina niin, kum 2016 khan a lo tlawh tawh a, hemi hnu kum 2018 leh 2023-ah a tlawh leh bawk. South Africa hi Africa biala India-in sumdawnna lama a thawhpui lian ber niin, ram pahnihte insumdawn tawnna hi kum 2023-24 chhung khan USD tld 19.25 a tling a ni.

India rama sumdawngte chuan April 2000 aṭanga September 2024 thleng South Africa-ah USD tld 1.3 chuang an invest tawh a, investment an tihna sector hrang hrang huamin; damdawi, IT, automotive, banking, leh mining-te an tel.