ATM tam zawkah pawisa a awm lo

Sorkar laipuiin a hnuaia thawk, Group C leh D te hlawh chu pawisa faia Rs 10,000 ṭheuh a pek tel avangin ram chhunga ATM awm zinga 82%-ah pawisa lakchhuah tur a awm lo.

Pawisa note lian pahnih tih thih a nih avanga bank hrang hrangin dawrtu an ngah lutuk tihziaawmna atan sorkar laipui chuan central sorkar hnuaia thawk, Group C leh D-te November thla hlawh chu pawisa faia Rs 10,000 zel pek tel hi a lo rel tawh a ni.

Pay Commission chuan Group C leh D hnathawkte hi central sorkar hnuaia hnathawk mi nuai 47 zinga 89% an ni tih a sawi. Heng mite hi pawisa faia Rs 10,000 ṭheuh pek an nih chuan, pawisa pek chhuah ngai zat hi cheng vaibelchhe 4,170 chuang a ni dawn a ni.

Sorkar data-in a tarlan danin ram pumah ATM 2,02,801 a awm mek a ni. Sorkarin a hnathawkte hlawh atana pawisa faia a pek hmang hian ATM nuai 1.66 chu a chawm theih dawn a, nikhatah ATM pakhat hmanga Rs 2,500 chin lakchhuah theih a nih avangin hei hi mi vaibelchhe 1.6 chuangin an chhawr thei dawn a ni. Mahse hnathawkte hlawh atana lakpen a nih avang hian ATM tam zawkah chuan pawisa dah tur a awm lo a ni.

Central sorkar hnuaia thawk bakah, Delhi, Telangana, Haryana, Jammu and Kashmir leh West Bengal pawhin state sorkar hnuaia thawk, Group C leh D-te hlawh ṭhenkhat chu pawisa faia pek chhuah tuma a ni bawk.