Haryana jail-ah LeT bomb expert kut thlak

Haryana-a Karnal jail-ah jail tang pahnih chuan Nilaini khan an tanpui, Lashar-e-Toiba bomb expert chu kut an thlak.

Kum 73-a upa, LeT bomb expert Syed Abdul Karim Tunda hi ramchhunga bomb tihpuah ṭum 40 zetah inhnamhnawiha puh a ni. Kut thlak a nih avang hian Nilaini zan khan Ghaziabad jail-ah sawn nghal a ni.

Police-te chuan tangte hi thingpui an in laiin an inhnial a, mi pahnih hian Tunda hi an beihrawn ta niin an sawi. Tang pahnihte hian Tunda hi rehhlum an tum a, mahse jail staff-teín an rawn chhan hman a ni. Hemi hnu hian medical check-up turin damdawi-inah kalpui nghal a ni a, a dinhmun a ṭha niin SP Karnal Pankaj Nain chuan a sawi.

Tunda beitute hi Amandeep leh Joginder-te an ni a, he thil thleng vang hian Tunda hi venhimna pawh pekbelh nghal a ni a, beitu mi pahnihte hi tualthah tum thubuai siamsak an ni bawk.

Kum 1997-a Panipat-a private bus-a bomb puak kaihhnawihah Tunda hi nimin khan Panipat court-ah a inlan. Uttar Pradesh-a Ghaziabad district ami, Tunda hi kum 2013 khan Nepal ramri bulah Delhi police-teín an man a ni. CBI chuan Jammu and Kashmir pawn lama LeT pawikhawihna lian tham thleng ṭhinah mawhphurtuah a puh. Mumbai, Hyderabad, Delhi, Rohtak leh Jalandhar-a bomb puak 43-ah inhnamhnawiha puh a ni a, heng bomb puakah hian mi 20 chuang an thih bakah mi 400 chuangin hliam an tuar a ni.