House-ah eptuten lungawi lohna lantir chhunzawm zel

Nimina Parliament in hnih inkhawmah, eptu party-te chuan sorkar laipuiin pawisa note lian pahnih a tih thih chungchang sawiho phutin, rorel thei loin an au buai chhunzawm leh a, hei vang hian rorel inkhawm pawh tihtawp a ngaih leh phah a ni.

Lok Sabha-a Congress leader Mallikarjun Kharge chuan eptu pawlte chuan pawisa note tih thih chungchang hi House-ah sawiho an duh tih a sawi a, Speaker chu Rule 56 hnuaiah sawiho phalna pe turin a phut. Pawisa thi avang hian ram mipuiten harsatna nasa tak an tawk mek a, sorkar hnathawk leh mi retheiten hlawh an la thei lo a, an harsatna tawh chungchangte hi sawiho an duh tih a tarlang. Mahse sorkarin sawiho a duh lo a, a tlanchhe zel a nih chuan mipuite chu zawimuangin a tihlum mek a ni, a ti. Nitin sorkar chuan thupek thar a tichhuak a, ram pumin harsatna a tawk a, hetih lai hian sorkar lam chu hahdam takin a awm thei thung a ni, a ti.

Congress party hi eptu party dang JD (U), CPI(M) leh Trinamool Congress-teín an thlawp a ni.