Ramchhung

Congress party leh Rahul Gandhi twitter khawih sak

Congress Party leh Rahul Gandhi-a twitter account chu hack sak an ni a, ṭawngkam mawi lo tak tak thu post sak an ni. Mahse a hnu darkar khat velah heng account-te hi siamṭhat leh nghal a ni.

Nilaini zan khan Rahul Gandhi-a twitter account hi khawih sak a ni a, thu mawi lo tak tak ṭum riat zet an lo post sak a, an chhungkaw sawiselna thu te an pos tel. Congress Party account hi nimin zing khan khawih a ni leh bawk. Congress party leh Rahul Gandhi aiawhte chuan Delhi Police-a Cyber Cell-ah complaint an theh lut.

Japan-in India mi nuai khat chuang chhawr dawn

Japan chuan kum 2020-a Olympic Games a thlen tura atana a inbuatsaihnaah hnathawktu a indaih loh avangin, India ram aṭangin mi nuai khat chuang hnathawkin a chhawr dawn.

Skill Development Ministry hnuaia Technical Intern Training Program (TITP) leh Japan-a International Training Cooperation Organisation (JITCO) thawhdunna hnuaiah ṭhalai sing khat chu Tokyo-ah tirh an ni thuai dawn a, a hnuah Japan company-teín an demand dan a zirin hnathawk tur hi tirh belh zel an ni ang. Olympics atana inbuatsaihna piah lamah, ṭhalai tam tak chuan bullet train factory leh in sakna hmunah te hna an hmuh theih beisei a ni bawk.

Pawisa awm loh vangin UP-ah kawng dang

Uttar Pradesh-a Bilaspur khuaa chengte chuan sorkar laipuiin Rs 500 leh Rs 1,000 a tih thih hnuah bank aṭanga pawisa an lakchhuah theih loh avangin Nilaini khan Noida-Sikandrabad kawngpui chu darkar khat chuang an dang.

Dankaur-a Mandi Shyam Nagar-a bank hrang hrangten pawisa an neih loh thu an lo tar avangin mipuite hi an lungawi lo a, bank gate-te hi pawn lamah kalhin kawngpui an dang ta a ni. Bilaspur khuaa chengte chuan ni eng emaw zat pawisa lakchhuah tumin kal mah se an la thei lo a, bank chuan pawisa an nei lo tih an sawi bakah, ATM-ah pawh pawisa a awm lo niin an sawi. Mahse bank-a thawkte chuan an hmelhriatte erawh chu pawisa an pechhuak thei reng thung a ni, an ti.