PM Modi-a'n DGP meet kaihruai dawn

Intelligence Bureau leh Union Ministry of Home Affairs thawk dunin kumtina an neih ṭhin, DGP/IGP conference chu prime minister Narendra Modi-a'n a kaihruai dawn.

Conference hi Nava Raipur, Chhattisgarh-ah November 28-30 hian neih a ni dawn a, ram chhunga police hotu hrang hrang an tel ang. Tunlai India buaina langsar, 'White Collar terror modules' chungchang bakah pawikhawihna leh firfiaka chetnate, AI hmanga nuaibo chungchang thlurbing tum a ni.

Law enforcement, intelligence, leh investigation-a top officer-te chuan November 10 a Delhi bomb puaka white coller terror module inhnamhnawih dan chungchang kimchangte an thlir ho dawn. Delhi thil thlenga doctor-te inhnamhnawihna hian ram chhung police-te pawh a tihrilhhai hle niin senior officer chuan a tarlang. Hei vang hian ram chhunga tihdan inang khata operation kalpui dan tur ruangam din thuai a ṭul hle niin a sawi.

India ṭhenawm Bangladesh, Nepal, Sri Lanka, Pakistan leh Afghanistan rama geopolitic inthlakna thleng mek chuan nasa takin India-ah nghawng a nei thei tih senior officer-te chuan an sawi. Hengte avang hian thuk leh zau zawka ngaihtuahna sen a ṭul hle tih leh, ram rorelna tihdanglam duh mite lakah fimkhur pawh a ngai zual hle dawn niin an tarlang.

Meeting-ah hian hmarchhak state huam chhunga Naxalism, leh helna thleng ṭhin chungchang pawh ngaihtuah tur zingah telh a ni a; hei bakah hian ram chhunga cybercrime, leh digital hmanga inbumna pung nasate ngaihtuah tur zingah telh a ni bawk. AI hmanga dan leh thupek kenkawhna kawnga harsatna awmte sutkian a nih dan turte ngaihtuah tum a ni.

PM Modi chuan kum tluana agency te'n dan leh thupek an kenkawhna aṭanga hlawhtlinna an chan leh an thawh dan hrang hrangte thlir letna a nei nghal ang.