Ethiopia tlang kang vangin India thlawhtheihna din tir

Ethiopia-a Hayli Gubbi-a Pathiannia tlang kang vangin nimin khan India-a thlawhtheihna service eng emaw zat a bahhlah phah. Tlang kangin mei khu a vawrh chhuah chuan India khawthlang lam a tuam pha dawn a, hemi hnu hian China lam panin a kal dawn niin India Meteorological Department(IMD chuan a tarlang.

Tlang kang khu hian Gujarat, Rajasthan, Delhi, Haryana, leh Punjab a tuam pha dawn a; boruak bawlhhlawh nasa vanga buai mek Delhi pawh a nghawng lehzual rin a ni. India airline hrang hrang Indigo, Air India, leh Akasa-te chuan tlang kang thleng vanga harsatna thleng theite pumpelh nan service kalpui a nih loh thu X-ah an puang a ni.

India aviation body pawhin arline-te chu tlang kang khuin a tihbuai theih huam chhungte pumpelh turin thurawn a pe a; Directorate General of Civil Aviation (DGCA) chuan airline-te chu harsatna an tawhte report turin a hriattir bawk.

Ethiopia tlang kang hi kum 12,000 hnua a thlen leh vawikhatna niin, van boruak km 14-a sangah mei khu a vawrh chhuak a ni. Smithsonian Institution-a Global Volcanism Program chuan Hayli Gubbi hi Holocene hunlai, Ice Age tawp lam khan a kan hnuhnung ber chu a thleng tih sawiin hemi hnu hian a thleng nawn leh lo niin a tarlang.