India leh Afghanistan thawh dunna tur buaipui mek

Union minister Piyush Goyal leh Afghanistan industry and commerce minister, Alhaj Nooruddin Azizi te chu Thawhṭanni khan inkawmin ram pahnihte sumdawnna leh economic tihhmasawnna tura thawh dunna tur an sawi. Azizi hian ni nga cham turin India a rawn tlawh a, a cham chhungin ram hruaitu hrang hrang a kawm nghal bawk.

Piyush Goyal chuan Azizi nen an inkawm thu hi X-ah tarlangin; inbiaknaah chuan ram pahnihte economic huanga thawh dunna leh sumdawnna tihzauhna tur an thlurbing tih a sawi. Hei bakah hian bungrua leh investment a thawh dunna tluang tak neih dan turte an sawi tel thu a tarlang. Inbiakna hi ram pahnihte hlawkna thlen ve ve thei tura hma lakna tihchak an duh thute an sawi dun a ni.

Azizi hian a cham chhungin Associated Chambers of Commerce and Industry of India (ASSOCHAM) official-te a hmuh bakah, thuthar lakhawmtute a kawm bawk. Hun rei tak aṭanga ram pahnih thawh dun tawhna chu thar thawh leh ngei a duh thute, an ram private sector pawhin awmze nei zawka thawh ho an duh thu te a sawi lang bawk.

India leh Afghanistan hian tun hnaiah thawh dunna tur atana inremna an lo siam tawh, van boruak aṭanga inkalpawhna chu thuam chak a, hemi kaltlang hian investment leh inpawhna ṭha siam kawngah hun lo kal turah hlawkna a thlen theih beisei a nih thu minister chuan a sawi.