SIR chungchangah ECI leh AITMC meeting dawn

Ram chhunga state pakua leh Union territory pathuma Special Intensive Revision(SIR) kalpuina duh lohna Trinamool Congress-in an lantir hnuah, Election Commision of India chuan All India Trinamool Congress(AITMC) aiawhte chu naktuk hian meeting a neihpui dawn. ECI leh AITMC aiawhte hi Nirvachan Sadan, Ashoka Road, New Delhi-ah an inbe dawn a ni.

"Party ngenna chu ngaihtuah a nih hnuah AITMC aiawh an ruatte nen meeting hi neih a ni dawn a ni," tiin EC secretary chuan a sawi. EC hian meeting-ah mi panga tel an remti a, mahse, TMC hian 10 tal tel an phut thung. Party aiawh hian Derek O'Brien, Kalyan Banerjee, Mahua Moitra, Saket Gokhale-te an tel dawn tih an tichiang tawh.

West Bengal chief minister Mamata Banerjee chuan ECI hnenah hian lehkha thawnin, SIR kalpui chunchanga harsatna an tawh leh thil thlengte a hrilh hriat hnuah, ECI chuan ngenna chu ngaihtuahin inbiakna neih hi a remti a ni. TMC national general secretary, Abhishek Banerjee chuan meeting neih lai chu live-a pekchhuah a phut bakah, EC langtlang a nih leh nih loh tilangtu a nih tur thu a sawi ve bawk.

Assembly inthlan hmabak West Bengal-ah hian SIR kalpuina turah harsatna hrang hrang a awm thu CM Banerjee hian CEC Gyanesh Kumar hnenah lehkha thawnin a hrilh a ni. A lehkha thawnah hian data lakna tura document ngai tihchian loh leh training mumal pek a awm loh thute a tarlang. Hei bakah nitin eizawnna hrang hrang vanga mipuite hnen aṭanga data lak a harsat theih thute a tarlang a, SIR kalpui tur vanga nunna hial channa a thleng tawh niin a tarlang.

Hetih laiin West Bengal-a eptu pawl hruaitu, Suvendy Adhikari chuan Thawhlehni khan CEC hnenah hian lehkha thawnin, SIR kalpuinaah hian TMC chuan thil nihphung pangngai an tihbuai bakah police thuneihnate chu an hmang sual niin a sawi ve thung.