VIT Bhopal University-ah buaina chhuak

Madhya Pradesh-a Sehore district-a VIT Bhopal University-ah Thawhlehni zan khan university campus facility ṭhat loh vanga zirlaiten lungawi lohna an lantirnaah buaina a chhuak a, university hi November 30 thleng khar a ni zui nghal. Zirlai lungawi lote hian campus chhung bungrua eng emaw zat an tichhe bawk.

Lungawi lohna lantirnaah hian zirlai 4,000 bawr vel telin, university bungrua ṭha tawk lo, tui thianghlim intur mumal awm lo bakah, inthiarna ṭha lo leh ei tur ṭha tawk lote chu an lungawi loh chhan nia tarlan a ni. Tui thianghlim lo in vang hian zrilai mitliam an awm phah bakah thi an awm niin an sawi a; mahse, university official lam chuan an pha thung. Zirlaite dam loh chhan bakah, campus-a buaina thleng hi chhui chian a ni dawn tih police-te chuan an sawi.

Zirlai pungkhawmte hian university thuneitute chunga an lungawi lohna thute an aupui hnuah tharum thawhna thlen zuiin, campus chhung hmun hrang hrangah bungrua an tihchhiat bakah lirthei pasarih vel an hal. Lirtei hal zingah hian University bus, car, leh lirthei ke hnih nei a tel. Zirlai lungawi lote hian Vice Chansellor chenna chu an suasam tel a ni. Boruak sosang zel tur bengdai tur hian police force tirh an ni a, police-te'n campus boruak pawh a panngai leh tawh niin an tarlang.

Thil thleng vang hian MP Congress party president, Jitu Patwari chuan rorel lai sorkar BJP chu bei zuiin,"Sorkar chuan zirlaite chanvo chu a rahbeh sak a ni, Kan party chuan zirlaite dikna chhan nan kan bei dawn a, an hmalam hun tihchhiat kan remti lo," a ti.