SC-in Farm law pathum a 'stay'

Supreme court chuan nimin khan loneituten an dodal mek, sorkar laipuiin farm law pathum a siamte chu thupek awm leh hma chuan hmang rih loh turin a 'stay'.

Court chuan farm law chung­­changah loneitute leh sorkar laipui aiawhte inbiakna neihpuitu tur committee din a ni dawn tih a sawi bawk. Chief justice of India jus­tice SA Bobde chuan farm law thar pathum,  Farmers' (Empowerment and Protection) Agreement on Price Assurance and Farm Services Act, the Farmers' Produce Trade and Commerce (Promotion and Facilitation) Act, leh Essential Commodities (Amendment) Act te 'stay' an nih thu hi a sawiin, court chuan heng dan thar siam chungchanga loneitu leh sorkar inkara buaina awm chu a ṭha thei anga bera chinfel a tum a ni, a ti. 

Delhi border-a nawrh huaihawt mek, loneitu leh sorkar aiawhte hi inremna zawngin ṭum riat an inbe tawh a, mahse an la inrem thei lo a ni. Chief Justice chuan, hun rei tak nawrh huaihawt a nih tawh avangin he thilin a nghawngte chu ngaihtuah a ngai a ni tiin, thuneihna an neih angin he dan siamthar hi hman theih lohin a tihtawp lailawk sak tih a sawi. Hemi rual hian January 26-a loneituten lungawi lohna lantira Delhi-a tractor rally neih an tum pawh titawp turin a  hrilh nghal bawk. 

Thawhṭanni khan Supreme Court chuan sorkar laipuiin farm law duhlohna lantir avanga buaina chhuakte a buaipui dan chu a lungawi thlak loh hle tih a sawi. Buaina nasa leh boruak ṭha lo zawk thleng palh se, mawhphurtu zingah an tel vek a ni tiin, Chief Justice chuan an kuta thisen kai tur chu an duh lo tih na takin a lo sawi tawh a ni. Hei vang hian sorkar laipui chuan dan a siam thar pathumte hi a 'stay' loh chuan court chuan hma a la dawn tih a sawi a, nimin khan farm law pathumte 'stay' na tur thupek hi a tichhuak zui ta nghal a ni.