Covishield thawn chhuak ṭan ta
India rama Covid-19 vaccine hman tura pawm pahnih zinga pakhat, Covishield chu nimin khan Pune-a Serum Institute of India (SII) aṭangin khawpui hrang hrangah thawn chhuah ṭan a ni. Nimin bik khan dose nuai 56.5 thawn chhuah a ni.
Pune aṭang hian khawpui 13-ah nimin khan thawnchhuah a ni. Air India, SpiceJet, GoAir leh IndiGo thlawhtheihna hmangin Covishield hi Delhi, Chennai, Kolkata, Guwahati, Shillong, Ahmedabad, Hyderabad, Vijayawada, Bhubaneswar, Patna, Bengaluru, Lucknow leh Chandigarh-ah thawn an ni.
Vaccine pek chhuah hi January 16 aṭangin kalpui ṭan tum a ni a, healthcare leh frontline worker-te pek hmasak niin, a dawtah kum upa lamte pek an ni ang.
Sorkarin health worker vbc 3-te vaccine man tum sak dawn
Prime minister Narendra Modi chuan Thawhṭannia chief minister-te meeting a neihpuinaah, sorkar laipui chuan Covid-19 vaccine pek hmasak tur, frontline leh healthcare vaibelchhe 3-te vaccine pekna man chu a tum dawn tih a sawi.
Meeting-ah hian vaccine semchhuah dan chungchang sawiho a ni a, PM chuan state ṭhenkhatin ngen mah se vaccine pekchhuahna dah pawimawh hmasak, priority list-ah roreltu an tel lo tih sawiin, frontline leh healthcare worker-te pek hmasak ber an ni ang, a ti. Frontline worker-te vaccine pekna senso hi state sorkarin a tum a ngai dawn lo a, sorkar laipuin a tumsak vek dawn a ni.
Ram chhunga hman turin Covid-19 vaccine pahnih pawm a ni tawh a, hei bakah hian vaccine dang pali pawh pawm a nih dawn leh dawn loh ngaihtuah mek a ni tiin PM chuan a sawi. Expert-te chuan mipuiten vaccine ṭha leh rintlak an dawn ngei theihna turin fimkhur leh uluk takin an ngaihtuah mek a ni, a ti.
Vaccine pek chhuah a nih hunah a dawngtuah side-effect a lo awm palh a nih pawhin, hemi atan hian a ṭul anga hmalakna tur pawh ngaihtuah vek a ni, tih PM chuan a sawi bawk.
Thla 7 chhunga hri kai tlem ber ni thleng
Thawhṭanni khan ram pumah Covid-19 kai thar mi 12,584 an awm a, hei hi thla sarih chhunga ram chhunga hri kai hmuh chhuah thar an tlem ber ni a ni.
Union health ministry data tarlanah, Thawhṭanni thleng khan hri kai hmuh tawh hi 1,04,79,179 an awm. Hripui thihpui mi 167 awm belh lehin, Covid-19 vanga thi hi mi 1,51,327 an awm tawh bawk. Hri kai hmuh tawh zinga 96.49% chu enkawl dam an ni tawh a, thihpui rate hi 1.44% a ni. Hri kai enkawl mek chu ni eng emaw zat nuai thum hnuai lam a ni tawh a ni.