R-Day lawmnaah khuallian awm dawn lo

January 26-a Republic Day lawmna neih tura khuallian atana sawm, Britain prime minister Boris Johnson-a'n India ram a zin tur a rawn ṭhulh hnuah, sorkar chuan khuallian tur hian ram dang hruaitu a sawm hran tawh lo a, kum 50 chuang chhunga khuallian nei loa Republic Day lawmna neih ṭum khatna a ni dawn.

Khuallian nei loa R-Day lawmna neih hnuhnung ber chu kum 1966 kha a ni a, kum 1952 leh 1953 khan khuallian an awm lo  bawk. Kumina R-Day lawmna parade chu president Ram Nath Kovind-a'n a lo chhang dawn a ni. 

Hripui leng vangin kumin R-Day lawmna hi kum dang anga puiin neih a ni dawn lo a, parade-a tel tur pawh titlemin hun hman chen pawh a tawi zawk dawn a ni. Marching contigent-a mi 144 awm ṭhin pawh 96-ah tihtlem an ni ang. Rajpath-a pungkhawm thei zawt pawh kum danga tel ṭhin zat aṭanga hmun lia ṭhena hmun khat chauh kal phal a ni dawn bawk. 

Official-te chuan Boris Johnson a theih dawn tak loh avangin ram dang hruaitu khuallian tura sawm ṭhat leh chu, Johnson thlaktu anga inngaih theihna a awm dawn avangin dinhmun nuam lo taka dah an duh lo a, sawmna dang an siam ta lo niin an sawi.