Russia President Putin a rawn zin dawn

Russia president Vladimir Putin chuan thla thar December 4-5 hian prime minister Narendra Modi sawmna tihlawhtlingin India a rawn tlawh dawn. Putin hian kumtina neih ṭhin, India-Russia annual summit neih a rawn hmang dawn tih Ministry of External Affairs chuan nimin khan a puang. India-Russia annual summit neih tur hi a ṭum 23-na tur a ni.

Intlawhna kaltlang hian ram pahnih hruaitute hian an lo thawh dun tawhna hmasawnna thlirletna an nei nghal dawn a; 'Special and Priviledge Strategic Partnership' tihchakna turte an sawi rin a ni bawk. Ram pahnihte'n an hlawkpui theih tur thlir chungin khawvel huap leh ram pahnih huam chhunga harsatna awmte an sawi dawn niin, MEA thuchhuah chuan tarlang.

Putin hi kum 2021 hnua India a rawn tlawh lehna hmasa ber tur a ni dawn a, ram pahnih hruaitute inhmuh hnuhnung ber erawh kumin September 1-a Tianjin, China-a SCO summit neih khan a ni thung. Putin rawn zin tur hlawhtlinna tur hian foreign minister S. Jaishankar chuan kar hmasa khan Moscow-ah Russia President hi a lo hmu tawh bawk.

India leh Russia hian thawh dunna Declaration on Strategic Partnership chu kum 2000 khan an ziak fel tawh a, hemi rual hian kumtin summit neih leh politic, defence, economic leh technology sector-a thawh dunna tur ruangamte an siam fel vek bawk. Kum 2010 khan thawh dunna chu "Special and Priviledged Strategic Partnership" -ah an tisang leh bawk a ni.