ECI-in Voter List tihfel hun tur pawtsei

Election Commission of India (ECI) chuan state leh union territory 12-a electoral roll ennawnna, special intensive revision (SIR) kalpui mekah voter list tihfel hun tur a bituk chu kar khatin a pawtsei. Nakkum February 14-ah final list tihchhuah a ni ang.

ECI chuan nimin khan hemi chungchanga thupek thar hi tichhuakin, poll official-te chu voter draft list tichhuak turin kar khat hun a pek belh a ni. Enumeration period, December 4 thleng tura tih pawh December 11 ah pawhsei a ni a; draft voter list December 9-a tihchhuah tur chu December 16-ah a pawtsei bawk a ni.

SRI kalpui chungchangah hian kar liam ta khan Trinamool Congress leh eptu party dang hruaitute chuan chief election commissioner, Gyanesh Kumar chu New Delhi-ah an kalpui a, electoral roll ennawn hna kalpui mek chu a hun ruat ṭha leh turin an ngen.

Eptu party hruaitute chuan SIR chu awmze nei leh kalphung ṭha zawka ruahman turin EC an ngen. Hei hi roll ennawn hna thawk mektu, booth level officers (BLOs) te chuan hun tepter takah in tinah endik hna kalpui a ngaih avanga an buai thu report a awm vang a ni. West Bengal, Tamil Nadu, Madhya Pradesh, leh Uttar Pradesh-ah nawrna a nasat avangin BLO intihlum an awm nia sawi a ni bawk.

Nakkum kumtir lama assembly inthlan neihna tur, West Bengal state-ah chuan SIR level thum kalpuina tura a thawh hmasa ber chu zawh a ni dawn tawh. EC chuan November 29 zan thleng a endiknaah, voter list-ah hian mitthi tawh mi nuai 18.70 dah tel an la ni tih a sawi. Draft list peihfel a nih hunah list aṭanga paih ngai zat hi nuai 35 vel an tling dawn nia rin a ni.