Parliament Thlasik Ṭhutkhawm ṭan a ni

Parliament thlasik ṭhutkhawm, Winter Session chu nimin khan ṭan a ni. Session ṭan ni hian vice president thlan thar CP Radhakhrishnan chuan Rajya Sabha rorel inkhawm a kaihruai nghal a; finance minister Nirmala Sitharaman-i'n Lok Sabha-a bill pathum a pharh zinga pakhat Manipur GST (second amendment) Bill, 2025 chu eptute au buaina karah pawm a ni bawk.

Lok Sabha ṭhutkhawmah eptu pawlin 'Vote ruk' chungchangah rorellai beia an au buai avangin chawhnu dar 2 thleng inkhawm tihtawp lai lawk a ni, an luhkhawm leh hnuah rorelna mumal kalpui theih a nih loh avangin vawiina chhunzawm turin tihtawp a ni.

Vice president CP. Radhakrishnan kaihhruaina hnuaiah Rajya Sabha rorel inkhawm tluang taka neih a ni a; eptu party lamin chairman hnenah electoral roll ennawnna kalpui chungchanga debate hun hawng turin an ngen a, chairman hian an ngenna hi a hnawl sak. RS-ah hian FM Sitharaman chuan 2025-26 Supplementary Demand for Grants a pharh bawk a ni.

Lok Sabha-a bill pawm, Manipur Goods and Services Tax (Second Amendment) Bill, 2025 hi bill awmsa Manipur Goods and Services Tax (Second Amendment) Ordinance, kumin October 7-a dana pawm tawh thlakna tura tih a ni. Sitharaman chuan bill dang Central Excise (Amendment) Bill, 2025, leh the Health Security and National Security Cess Bill, 2025 a pharh tel bawk.

Sorkar laipui chuan tun winter session chhung hian bill 13 ngaihtuah tura pharh hman a tum a, pharh tum zinga bill tam zawk chu standing committee hnenah zirchian turin an la theh lut lo thung. Dan pangngaiah session hi ni 20 chhung neih ṭhin ni mah se, tun session erawh ni 15 chhung chauh neih tum a ni a; a rei loh ber ṭum a ni dawn a ni.