MHA-in Governor leh L-G hnenah Raj Bhavan hming thlak turin hriattir

Union Ministry of Home Affairs chuan Governor leh Lieutenant Governor-te principal secretary leh secretary-te hnenah, November 25 khan Raj Bhavan tih chu British thuneihna tilang thei thil a nih avangin a hming 'Lok Bhavan' tiha thlak turin a hriattir.

Hriattirna tihchhuahah hian Governor leh Lt. Governor-te chenna, Raj Bhawan leh Raj Niwas tih ṭhin chu official thilah chuan 'Lok Bhavan' leh 'Lok Niwas' tiha thlak tawh tur niin a tarlang. Hriattirna tihchhuah hnu hian West Bengal governor leh Ladakh Lt. governor-te chuan hming hi an thlak tawh a ni.

Hmarchhak state zingah Assam pawhin Raj Bhavan tih chu Lok Bhavan tihin a thlak ve tawh bawk. Hetih laiin Tamil Nadu chief minister M.K. Stalin chuan Pathianni khan hming thlak ringawt aiin rilru put hmang thlak chu a pawimawh hmasa tih a sawi ve thung.