NHAI leh Reliance Jio-in MoU ziak

National Highways Authority of India (NHAI) leh Reliance Jio-te chuan national highway a him tawk em tih hriat theihna tur; mobile-a hman chi 'safety alert system' siama thawh dunna tur Memorandum of Understanding (MoU) an ziak. Alert service hi thla hnih hnuah hman ṭan theiha peih hman tum a ni a, Jio 4G leh 5G hmangtu te'n alert hi an dawng thei dawn a ni.

Safety alert system hmang hian national highway hmangtuten SMS, WhatsApp,leh high-priority call hmangin hriattirna an dawng dawn a; accident awlsamna hmun, ran vulh tlat tamna, chhum zin nasatna leh emergency diversions awmnate an hre zung zung thei ang.

System thar hi phase hrang hrangin NHAI digital platform kaltlanga hman theih tura siam a ni dawn a, Rajmargyatra mobile app leh emmergency helpline number 1033 kaltlangin Ministry of Road Transport and Highway chuan hman theih hun hriattirna a tichhuak leh ang. Pilot programme chu highway hmun thlan bikah system enchhinna kalpui a ni dawn. Nimina MoU ziah hi Reliance Jio nen chauh a la ni rih thung.

NHAI chairman Shri Santosh Kumar Yadav chuan,"Hmalakna thar hi kawngpuia lirthei leh mihring himna tihhmasawnna tura duan a ni a, tun dinhmunah chuan Jio hmangtute tan chauh a la ni rih dawn a ni. Highway him zawk a awm theihna tur hian telecom service provider dang nen pawh thawh hona siam zel tum a ni," a ti. Hmalakna thar hian a hun takah highway hmangtute a puih thei dawn thu a sawi bawk.