Parliament winter session-ah SIR debate nei dawn

Parliament thlasik ṭhutkhawm (Winter Session) ni hnihna chu nimin khan neih chhunzawm leh niin, house pahnihah electoral roll ennawnna, Special Intensive Revision (SIR) kalpuina chungchang chu eptu pawl te'n sawi ho ngiatin au buaina a chhuak zui. Ṭhutkhawm ṭan leh a nih hnuah Congress leader K Suresh chuan SIR sawi hona chu December 9-ah neih tum a nih thu a tarlang.

SIR bakah hian eptu pawl lamin an ngiat zinga mi, Vande Mataram kum 150 tlin lawm dan chungchang chu lower house-ah prime minister Narendra Modi kaihhruaina hnuaiah December 8 hian sawi ho tum a nih thu a tarlang bawk. SIR chungchangah hian darkar thum chhung debate neih tura ruahman a ni.

Eptu pawl lam hian Rajya Sabha-ah SIR chungchang sawi ho an phut vang hian buaina an siam a, rorel theih lohin house aṭangin an chhuak. Sorkar laipui chu SIR chungchang sawi duh lo leh ngai pawimawh lo niin an puh.

Parliamnet session ṭan a nih aṭangin eptu pawl lam hian SIR chungchanga debate neih chu an ngiat nghal a, rorel inkhawm pawh tihtawp lailawk a ngaih phah fo a ni. Ni hnih chhung an ngiat hnuah an ngenna chu tihhlawhtlin a ni dawn ta a ni. SIR chungchanga debate neih tur hi union parliamentary affairs minister Kiren Rijiju leh speaker te'n an sawi ho hnuah remtih a ni ta a ni. Eptu lam hian SIR bakah Delhi-a Red Fort bula bomb puak leh, Delhi-NCR huam chhunga boruak bawlhhlawh chungchangte pawh sawi ho an phut bawk.