PAK thlawhtheihnate India-in airspace hman remti

India chuan Sri Lanka-a Cyclone Ditwah vanga chhiat tawkte puia chhawmdawlna pe tur, Pakistan thlawhtheihnate chu India ram boruak (airspace) hman a remtih sak. Hetih laiin Pakistan media lam chuan India chu dik lo taka puhin, airspace hman remti lo niin a tarlang thung.

Sorkar laipui chuan puihna pe tur thlawhtheihna chu India airspace hman dilna an dawn aṭanga darkar li chhungin a phalsak tih a tarlang.

Pakistan media puhna chu India chuan thudik lo a nih thu leh, belhchian dawl lo thil mai mai a nih thu an sawi chiang tawh a; Pakistan-in airspace hman dilna a siam chu international norms zulzuiin uluk taka ngaihtuah a nih hnuah phalsak an nih thu an tarlang. India thutlukna siam hi sorkar pawmpui leh remtihna thlap a nih thu official chuan an sawi.