Vawiinah Putin-a'n India rawn thleng dawn

4th December, 2025

Russia president Vladimir Putin chuan vawiin hian India-Russia annual summit hmang turin India a rawn thleng dawn. Naktukah prime minister Narendra Modi nen inkawmin thawh dunna tur kawng hrang hrang an sawi dun dawn a; Ukraine leh Russia inkar buaina chungchang pawh an sawi dun dawn a ni.

Putin leh Modi hian thawh dunna lo kalpui tawh thlirletna neih rualin, ram pahnih ve ve huam chhunga harsatna awmte bakah sorkar leh commercial huanga inremna neih tur chungchangte an sawi dawn tih official chuan an tarlang. Summit neih tur hi U.S. in Ukraine peace plan siam thar leh tura a nawr hnu niin, Russia leh Ukraine buainaah India chu oil leisak hmanga sum hmanga Russia puiah US hian a puh tawh a ni.

Hetih laiin US puhna hi India chuan chhangin, a ram mipui mi tluklehdingawn 1.4 mamawh phuhrukna tur leh oil leina man tlawm zawk leh energy mamawhna sang zel phuhruk theihna tur a nih vang zawka lei a nih thu leh; Russia aṭanga man tlawm zawka lei theih a nih vang tih a lo sawi tawh bawk. PM Modi chuan Ukraine nen an buainaah hian Russia demna thu a la sawi chhuak lo chungin remna leh muanna awm thuai se a duh thu a lo sawilang thung.

Ram hruaitu pahnihte hian economic tihhmasawnna turin thawh dunna tur hrang hrang an sawi dun dawn a, economic cooperation, trade facilitation, maritime, healthcare leh media exchange chungchangte summit-ah hian sawi ho tum a nih thu official chuan an tarlang.

Venhimna thuah 5-in Putin veng dawn.

Vawiina India rawn thleng tur Vladimir Putin chu venhimna thuah nga hmanga ven a ni dawn. Russia aṭangin Presidential Security Service, leh India-a National Security Guard top Commandos, Sniper, Drone, jammer, leh AI monitoring-te hmangin venhimna pek a ni ang.

Putin hi Rashtrapati Bhavan-ah lawmna inkhawm buatsaih a ni dawn a, PM Modi bakah president Droupadi Murmu a hmu dawn a, Hyderabad House-ah summit hmang turin a kal nghal dawn bawk. Venhimna khauh zawka kenkawh a nih theihna tur hian nimin khan Russia aṭangin security personnel eng emaw zatin India an rawn thleng tawh a ni.