India-in Shanghai-ah Consulate building thar hawng

India sorkarin Shanghai-ah tunlai thiamna leh theihna sang ber hmanga duan Consulate thar a siam chu Pathianni khan China-a India ambassador Pradeep Kumar Rawat chuan a hawng. Office building thar hi Changning district lun laiah sak niin sqm 1,236.63 a zau a awh a, building hmasa aiin a let hnihin a zau zawk a, nimin aṭangin an hmang ṭan nghal.

Consulate thar hi kum 32 hnua China sumdawnna hmunpuia sawn a nih vawi khatna niin, Shanghai consulate hian India hnuaia sumdawnna lian tak tak awmte a enkawl thei dawn bawk. India leh China hian hun rei tak chhung an in nghirngho hnuah sumdawnna leh inkalpawhna hrang hrangah inremna an nei chho mek a; thlawhtheihna direct flight pawh an service tir leh tawh a ni.

Shanghai Consul General Pratik Mathur chuan building thar hawn chuan India leh China thawh dunna atan an inpekna a tilang tih sawiin; a hlawhtlin theihna tura Ministry of External Affairs leh Shanghai-a tualchhung thuneitute inpekna chu fakawm a tih thu a sawi. Consulate thar hian mipui tana hnathawh a tihawlsam phah dawn niin a tarlang bawk.

Mathur chuan hmalakna chu PM Modi-a hmathlir 'Sabka Saath, Sabka Vikas' tihhlawhtlinna kawng khat a ni tiin, mipui mil tur sorkar dinna pakhat a nih thu sawi lang tel bawk. India mi chengte tana hlawkpui tur thlen thei a nih piah lamah, inrelbawlna bung thar kaina pawimawh tak pakhat a nih thu a sawi.