Telangana vety doctor pawngsual rawntu Mi palite police-in kaphlum
Hyderabad-a November 27 zana veterinary doctor hmeichhia pawngsual rawna thattu, mi palite chu nimin zing khan police-te nen an inbeihnaah an vaiin kahhlum an ni. Vety doctor pawngsual rawntute hian an hmeichhe pawngsual hi thatin a ruang hi an hal zui a, pawikhawihna a thlen tukah hmeichhe ruang hi hmuh chauh a ni.
Police-te chuan pawngsualtua puh mi palite hi an man hnuah, nimin zing dar 3 vel khan an pawikhawihna hmunah hian thil thlendan te hriatchian tumin an hruai a ni. Hmeichhe ruang an hmuhna bula lei, Hyderabad aṭanga km 50 vela hlaa an awm laiin heng misualte hi tlanbo tumin an zinga pahnih chuan police-te silai laksakin an bei zui a ni. Hei vang hian police-te chuan invennan kap let nghalin, an pali hian an kaphlum tih an sawi.
Hyderabad deputy commissioner of police, Prakash Reddy chuan heng mi palite hi inbeihnaa thi an nih thu sawiin, police-te silai ken laksakin an hmetpuak a, hei hi chu police lamin an lo kap let tih a sawi. Heng mi palite hi damdawi lam thiamte an thlen hmain chhan hman lohin an thi tih a sawi bawk.
Pawngsualtu mi pali an kahhlumte hming pawh puangzar nghalin, Mohammad Areef, Jollu Shiva, Jollu Naveen leh Chintakunta Chennakeshavulu te an ni tih police-te chuan an sawi nghal bawk. National Human Rights Commission (NHRC) chuan senior police officer kaihhruai team chu thil thlen dan chhuichiang turin Telangana-ah a tir dawn tih a sawi a, report pawh an pek thuai tur thu a sawi.
Telangana Law Department pawhin he thil thleng hi fast-track court chhui tir a remti bawk. Union home ministry chuan Telangana sorkar hnenah, nimin zinga police-te chet dan leh thil thlen dan chu Ministry of Home Affairs (MHA) kaltlangin NHRC-ah a hriattir a ngai tih a sawi bawk.
Vety doctor pawngsual rawn leh rawng taka thah a, a ruang halral zui a ni hian dem a hlawhin, pawngsualtute na taka hrem tura nawrna a na hle. Parliament-ah pawh he pawikhawihna thleng hi sawichhuah niin, MP ṭhenkhat chuan pawikhawihtute hi khaihlum ngei an phut thu pawh an sawi a ni. Hemi rual hian nimin zinga pawngsualtu mi palite thih danah hian ngaihdan hrang hrang a awm thung a, mi tam takin police-te fakna thu an sawi laiin, thil rinhlelhawm a awm nia ngai tam tak an awm ve bawk.
Mi ṭhenkhat chuan police-te thil sawi hi an pawm lo tih sawiin, hetiang zawnga rorelna kalpui chu ṭha an tih loh thu leh, an inbeihna thlen dan an sawi chu chhuichian an phut thu an sawi ve bawk.