Shashi Tharoor-a'n Farooq Abdullah lehkhathawn a twitter-ah post

Congress hruaitu, Kerala Member of Parliament Shashi Tharoor chuan nimin khan Jammu and Kashmir (J&K) chief minister hlui Farooq Abdullah lehkhathawn chu a twitter-ah a post.

He lehkhaah hian Abdullah chuan thil tihsual a neih loh thu leh, senior Member of Parliament (MP) leh political party hruaitu hlun sorkar laipuiin a in chhuahsan theih loa a hreng reng chu thil dik a nih loh thu a ziak lang a ni.

Parliament thlasik ṭhut khawm chu thla hlui ni 18 khan ṭan a ni a, December 13-ah zawh fel tum a ni. He thlasik ṭhutkhawm neih mekah hian Tharoor chuan Abdullah hi tel ve se a duh thu leh, Parliament a pawimawhna chhan chu kan rama "democracy leh sovereignty" tihnghetna lantirna a nih thu a tweet lang bawk. 

Tharoor-a lehkha dawnah hian Abdullah chuan October 21-a Tharoor-a'n lehkha a thawn chu December 2 khan a inthlithlai bertu Magistrate hnen aṭangin a hmu ve chiah thu a sawi a, a hmuh ni hian Abdullah hian Tharoor hnenah hian lehkha a thawn let ve nghal a ni.

Abdullah bakah hian midang a fapa Omar Abdullah, CM hlui tho Mehabooba Mufti-te chu August 5-a sorkar laipuiin J&K special status pekna, Article 370 a tihtawp sak aṭang khan  an in leh lo chhuahsan thei loin an hreng a, vawiin thlengin hren chhunzawm an la ni. Sorkar laipui chuan  poltical leader a hren mekte chhuah an nih hun tur hi a la sawi thei lo.