Mamata-i'n Egypt aṭangin Purunsen lakluh a tum

West Bengal chief minister Mamata Banerjee chuan Egypt aṭangin purunsen tonne 800 lakluh a nih tur thu a sawi.

Purunsen hi National Agricultural Cooperative Marketing Federation of India (NAFED) kaltlanga lakluh tur a ni a, Mumbai port a lo thlen hunah, a hmunah hian kg 1-ah Rs. 55 a lei theih a ni a nga, Kolkata thlenpui a nih meuh chuan kg 1-ah Rs. 65-a zawrh tur a ni thung ang.

India ram pumah purunsen man hi a sang chho chak hle. A man sanna chhan hi nikum leh kumin chhunga ruahtui dawn ṭhat loh vang leh, India rama a chinna hmun ṭhenkhatah tuilianin an thlai chinte a tihchhiat nasat avang a ni. Purunsen tharchhuah a tlem avangin rampumah harsatna a thleng mek a ni. 

Hetih lai hian West Bengal-a Ma­mata kaihhruai Trinamool Cong­­ress (TMC) sorkar chuan ram puma purunsen man tihsan a nih chung changah hian sorkar laipui chu a mawh­phurtuah puhin, harsatna sukiang tura nasa taka hma la turin a ngen.

Purunsen man hi West Bengal-ah chuan kg 1-ah Rs. 150 a nih thu tarlan a ni a, heng an mamawh phuhrukna tura Mamata-in ramdang aṭanga purunse lakluh a tum hi December thla chhunga a thlen hman beisei a ni.