RGI-in State leh UT-te census funtionaries ruat turin hriattir

Registrar General of India (RGI) chuan state leh Union Territory(UT)-te chu, nakkum aṭanga chhiarpui neih ṭan tur atana data hrang hrang lak khawm hna thawktu tur a rang lama ruat turin a hriattir. RGI hian data lakhawmtu tur officer-te chu nakkum January 15 hmaa thlang fel hman turin a hriattira, data tam tham tak lakkhawm a ngaih dawn avangin tihfel thuai a ṭul thu a tarlang.

Hriattirna tihchhuahah hian mihring 700-800 bawr zel data lakhawmtu tur enumerator leh supervisor pakhat zel ruat tura tih a ni a, Census Rules (1990) a Rule 3-in a phut angin enumerator tur hian state sorkar hnuai hnathawk zirtirtu emaw clerk emaw official dang ruat theih an ni a. Hetih laiin supervisor tur erawh chuan officer general chin chunglam ruat theih a ni thung.

RGI chuan kum danga la tih ngai loh web portal Census Management and Monitoring System (CMMS) a duang chhuak a; he portal kaltlang hian enumerators leh supervisor ruatte, enumeration block leh supervise tur huam chinte thlithlai a endik theih a ni dawn a ni. Hei bakah hian data lakkhawm kalpuina atana hna thawh chin pawh endik theih a ni dawn a ni.

Chiarpui neih tur hi thawh hniha kalpui tur niin digital hmanga kalpui tura ruahman a ni a, thawh khatnaah hi April leh September 2026 inkarah, in leh lo chhiarpui 'House Listing and Housing Census' hmanga kalpui a ni dawn a; thawh hnihna hi February 2027 aṭangin mihring chhiarpui 'Population Enumeration (PE)' hmanga neih leh tum a ni.

Hei bakah hian kum danga la tih ngai loh chi bil chhiarpui 'caste enumaration' chu Cabinet Committee on Political Affairs-in April 30-a an lo rel tawh angin kalpui ṭan tum a ni bawk.