Rajasthan Assembly-in CAA duhlohna resolution pass

Kerala leh Punjab state te'n Citizenship (Amend­ment) Act (CAA) duhlohna an assembly-a an pass hnuah, kar kal ta Inrinni khan Rajasthan assembly chuan CAA duhlohna resolution chu a pass ve bawk.

Rajasthan assembly-ah hian National Population Register (NPR) leh National Register of Citizens (NRC) pawh sawiho a ni a, sorkar laipuiin he hmalakna a kalpui mek hi hnuk kir turin an ngen. "CAA hian kan ram danpuia inziak sakhaw tih bik nei lo (secular) ruhrel a kalh a, sakhuanna hmanga India mipuite thliar hran­na a nih bakah, Arti­cle 14 in a sawi angin mipuite intluk tlang taka dan hnuaia venhim kan nihna te chu he dan hian a kalh a ni," tiin house member-te chuan CAA duh lohna resolution hi  an pass  a ni.

Telangana-in CAA duhlohna resolution pass tum ve bawk

Kar liam ta Inrinni khan Telangana chief minister K Chandrashekhar Rao chuan an state assembly neih turah, CAA duhlohna resolution an pass ve dawn thu a sawi.

"Keini chuan langtlang takin CAA kan dodal a, kan hma lawkah hian state assembly kan nei dawn a, he hunah hian he Act duhlohna resolution hi kan pass ve dawn a ni. Hei bakah hian National Population Register (NPR) leh National Register of Citizens (NRC) chu kan dodal tlat bawk," tiin thuthar thehdarhtute hmaah Rao chuan a sawi bawk. Rao chuan CAA siam chungchangah sorkar laipui chuan 100% in a tisual a ni tiin, India chu sakhaw bil ram ni loin, mipuite ram a ni, a ti. Prime Minister Narendra Modi chu CAA chungchang ngaihtuah ṭha leh tura a duh thu sawiin, "Ram tana thil ṭha lo a ni. Mi tam takin an hlauthawng, sawifiah an tumna lamah minister-te ngei pawh an thu te a inkalh fo bawk. Hei hi ram tan a ṭha ngai lo," tiin a sawi. 

Telangana Municipal Election neih zawk takah khan CM Rao kaihhruai Telangana Rashtra Samiti (TRS) chuan seat 120 awmah seat 109 an la a, corpora­tion-a seat pakua awmah seat pasarih an la bawk.