India leh Brunei-in JWG hawnna pualin meeting nei

India leh Brunei chuan defence huanga thawh dunna tur, Joint Working Group (JWG) hawnna pualin Thawhlehni khan New Delhi-ah meeting an nei. Meeting hi Ministry of Defence joint secretary, Amitabh Prasad leh Brunei defence ministry-a deputy permanent secretary Poh Kui Choon te'n an kaihruai dun. Meeting neih hma hian ram pahnihte hian JWG mumal taka kalpuina turin Terms of Reference (ToR) an ziak bawk a ni.

JWR hi ram pahnih defence lama thawh dunna tihchakna tura ruahman a ni a, ToR ziah chu thawh dunna tur ruangam thar bul ṭanna a ni tih ministry chuan a tarlang bawk. JWG hi institutional platform anga thawkin, hmalakna kal mek leh thawh dunna tur thil thar hriat theihna atana hman tura ruahman a ni bawk.

Meeting-ah hian sipai leh sipai inkara thiamthil inhrilhtawn, nunchan zir hona neih leh tuipui huam chhunga venhimna kalpui kawnga thawh dunna leh Humanitarian Assistance & Disaster Relief (HADR), thiamna tihhmasawn bakah industry leh technology huanga thawh dunte chu sawi ho pawimawh zingah telh a nih thu Ministry of Defence chuan a tarlang.

Brunei deputy permanent secretary Choon hian ni hnih a cham chhungin defence secretary Rajesh Kumar Singh a biak bakah Defence Public Sector Undertaking (DPSU) Bhawan hawn thar a tlawh nghal bawk.